میری بیگم پیکے گئی اے
سُتی قسمت جاگ پئی اے
میری بیگم پیکے گئی اے
ہساں کھیڈاں، لُڈیاں پاواں
نچاں گاواں، موجاں ماراں
کھابے کھا کے، بڑھکاں ماراں
دنیا لگے جنت جئی اے
میری بیگم پیکے گئی اے
لاہور پنڈی دی سیر کراں گا
لائلپور دی بس چڑھاں گا
اپنے سُپنے سچ کراں گا
زندگی دی رُت جاگ پئی اے
میری بیگم پیکے گئی اے
پیزا ہَٹ تے جاواں گا میں
تِکّہ بوٹی کھاواں گا میں
کَلّیاں جشن مناواں گا میں
زندگی نمانی ماڑی جئی اے
میری بیگم پیکے گئی اے
پہلے سُکھ دا سانہہ نہی آیا
کدی نواں میں سُوٹ نہی پایا
ٹچ موبائل لئی دل ترسایا
اج ای کپڑے تے جُتی لئی اے
میری بیگم پیکے گئی اے
جھاڑو پوچا ہُن نہی لونا
خطرہ بیلن دا نہی ہونا
چھڈ دِتا میں لُک لُک رونا
بیگم گردی سب کچھ سہی اے
میری بیگم پیکے گئی اے
جتھے چاہواں جُتی لاہواں
پسند اپنی دے کپڑے پاواں
مہنگے ہوٹلاں تے میں جاواں
ساری دولت کاہدے لئی اے
میری بیگم پیکے گئی اے
بیگم باجوں زندگی سوہنی
ٹینشن خرچے دی نہی ہونی
کِھل کِھل ہسّے صُورت رونی
کِسے سیانے ایہہ گل کیہی اے
میری بیگم پیکے گئی اے
POST A COMMENT.